Ghasia zimesababisha watu zaidi ya 17,000 kuwa wakimbizi katika eneo la Cabo Delgado nchini Msumbiji: UN

UMOJA WA MATAIFA - Msemaji wa Umoja wa Mataifa Stephane Dujarric Alhamisi wiki hii amesema kuwa Shirika la Umoja wa Mataifa la Huduma ya Kibinadamu kwa Anga linasafirisha misaada kwa watu karibu 17,000 wanaokimbia mashambulizi katika eneo la Cabo Delgado nchini Msumbiji ndani ya wiki moja iliyopita.

"Washirika wetu pia wanatanguliza chakula, vifaa vya elimu na usafi," Dujarric amesema. "Tangu mwanzo wa mwaka sisi, pamoja na washirika wetu, tumefikia watu 100,000 huko Cabo Delgado. Tunalenga kufikia watu 84,000 kwa msaada wa kibinadamu wa mara kwa mara katika wilaya za Ancuabe na Meluco."

Waliokimbia makazi yao wametoka wilaya za Kaskazini za Ancuabe na Chiure, Dujarric amesema. Idadi kubwa ya watu waliokimbia makazi yao ni wanawake na watoto.

Amesema, mashirika ya kibinadamu yamesaidia zaidi ya watu 1,700 hadi sasa.

"Tunazikumbusha pande zote zinazohusika na mgogoro kwamba lazima ziheshimu na kulinda raia, na pia kuwezesha misaada ya kibinadamu ya haraka, salama na isiyozuiliwa kwa raia wanaohitaji," msemaji huyo amesema.

“Pia ni muhimu watu wanaoishi katika mazingira magumu, wakiwamo wazee, walemavu, wajawazito na watoto wasio na walezi au waliotenganishwa na familia zao, wafikiwe na msaada wa chakula, malazi, ulinzi na misaada mingine ya dharura haraka iwezekanavyo,” ameongeza.