Nyaraka za kuunga mkono makubaliano ya kusimamisha vita Gaza zatiwa saini kwenye mkutano wa viongozi wa Sharm el-Sheikh, Misri

Rais wa Misri Abdel Fattah al-Sisi (wa pili kushoto, mbele), Rais wa Marekani Donald Trump (wa pili kulia, mbele), Rais wa Uturuki Recep Tayyip Erdogan (wa kwanza kulia, mbele), na Amir wa Qatar, Sheikh Tamim bin Hamad Al Thani (wa kwanza kushoto, mbele) wakionyesha nyaraka zilizotiwa saini za kuunga mkono makubaliano ya kusimamisha vita Gaza kwenye mkutano wa viongozi kuhusu kusimamisha vita Gaza uliofanyika Sharm el-Sheikh, Misri, Oktoba 13, 2025. (Ikulu ya Misri/kupitia Xinhua)

SHARM EL-SHEIKH, Misri – Nyaraka za kuunga mkono makubaliano yaliyofikiwa hivi karibuni ya kusimamisha vita Gaza zimetiwa saini jana Jumatatu huko Sharm El-Sheikh, Misri na wapatanishaji wanne wa makubaliano hayo, lakini Israel na Hamas hazikushiriki kwenye hafla hiyo, ambapo nyaraka hizo zimetiwa saini na Rais wa Misri Abdel Fattah al-Sisi, Rais wa Marekani Donald Trump, Rais wa Uturuki Recep Emir Taym Taybin, Rais wa Uturuki Recep Taybin Tay Hamad Al Thani.

Mkutano huo wa viongozi, ulioongozwa kwa pamoja na Marais wa Misri na Marekani, ulihudhuriwa na viongozi kutoka nchi zaidi ya 20 na mashirika ya kikanda na kimataifa.

"Ninawakaribisha nyote kwenye Mkutano wa Amani wa Viongozi wa Sharm el-Sheikh, katika wakati huu muhimu na wa kihistoria, ambapo kwa pamoja tumeshuhudia kufikiwa kwa Makubaliano ya Sharm el-Sheikh ya kusimamisha vita Gaza," Rais Sisi amesema katika hotuba yake kwenye mkutano huo.

Amesema hatua hiyo inasimama kama "mwanga wa matumaini kwamba ukurasa mchungu katika historia ya binadamu utafungwa na kuelekea kwa zama mpya za amani na utulivu katika Mashariki ya Kati, na kuleta siku nzuri zaidi baadaye kwa watu wa eneo hili, ambao wamekuwa wakichoshwa sana na migogoro."

Rais Sisi amesisitiza uungaji mkono kwa utekelezaji wa mpango huo wa kusimamisha vita Gaza, akisisitiza kuwa makubaliano hayo lazima "yaimarishwe na kutekelezwa kwa hatua zake zote, na kupelekea kufikiwa kwa mpango wa utatuzi wa nchi mbili."

“Mkutano huo wa viongozi uliweka mkazo katika kuunga mkono makubaliano ya Sharm el-Sheikh yaliyosuluhishwa na Misri, Marekani, Qatar na Uturuki, na kusainiwa tarehe 9 Oktoba, ili kukomesha vita vya Gaza” ikulu ya rais wa Misri imeeleza.

“Pia mkutano huo umesisitiza umuhimu wa ushirikiano wa jumuiya ya kimataifa ili kutoa mbinu zote zinazohitajika kwa kuhakikisha utekelezaji wa vifungu vyote vya makubaliano hayo na kuhakikisha utekelezaji wake mpaka mwisho, ikiwemo usimamishaji vita wa pande zote huko Gaza, kukamilika kwa mchakato wa kubadilishana mateka na wafungwa, kuondoka kwa majeshi ya Israel, na kuingia kwa msaada wa ubinadamu na mahitaji katika Ukanda wa Gaza” ikulu ya rais wa Misri imeongeza.

Kipindi cha kwanza cha utekelezaji wa mpango huo kinahusu kuondoka kwa wanajeshi wa Israel kutoka Mji wa Gaza, Rafah, Khan Younis na eneo la kaskazini, kubadilishana mateka na wafungwa, na kufunguliwa kwa njia tano mpakani kwa ajili ya kusafirisha vitu vya msaada.

Hamas ilitangaza mapema jana Jumatatu kwamba imekabidhi mateka wote 20 waliobaki bado wahai, ambao walikamatwa kwenye shambulizi la kusini mwa Israel Oktoba 7, 2023. Wakati huo huo, mamlaka za Israel zimeanza kuwaachilia huru wafungwa wapalestina karibu 2,000 kama sehemu ya makubaliano ya kubadilishana.

Miaka zaidi ya miwili ya operesheni za kijeshi za Israel zimeiharibu Gaza, ambapo vifo vya watu vilifikia zaidi ya 67,000 na kusababisha balaa ya njaa, takwimu kutoka mamlaka za afya za Gaza na wataalam wa chakula wanaoungwa mkono na Umoja wa Mataifa zinaonesha.

Rais wa Misri Abdel Fattah al-Sisi (wa pili kushoto, mbele), Rais wa Marekani Donald Trump (wa pili kulia, mbele), Rais wa Uturuki Recep Tayyip Erdogan (wa kwanza kulia, mbele), na Amir wa Qatar, Sheikh Tamim bin Hamad Al Thani (wa kwanza kushoto, mbele) wakihudhuria utiaji saini nyaraka za kuunga mkono makubaliano ya kusimamisha vita Gaza kwenye mkutano wa viongozi kuhusu makubaliano ya kusimamisha vita Gaza uliofanyika Sharm el-Sheikh, Misri, Oktoba 13, 2025. (Ikulu ya Misri/kupitia Xinhua)