Uzuri wa Majira: Theluji Ndogo

Habari zenu nyote! Mimi ni Sisi, mpenda kutalii! Leo ni Xiaoxue, au Theluji Ndogo, moja ya vipindi 24 katika kalenda ya kilimo ya China. Ni kipindi kinachohusiana moja kwa moja na hali ya hewa, kikiashiria baridi inazidi na mvua au theluji inaongezeka. Pia ni hatua muhimu kwa wakulima kuandaa na kuhifadhi vitu kwa ajili ya majira yajayo ya baridi. Sasa niko Luoyang, mji mkuu wa kale wa Mkoa wa Henan, katikati mwa China, unaojulikana sana kwa jina la "Mji Mkuu wa enzi 13 za China ya kale." Fuatana nami tuchunguze kwa pamoja mvuto wa mapema wa majira ya baridi wa mji huu wa kale na kugundua hekima ya kilimo cha majira ya baridi!

Mjini Luoyang, kwa sasa theluji huenda haijaanguka, lakini halijoto imeshuka sana. Wakulima mashambani tayari wameanza kujiandaa kwa ajili ya majira ya baridi. Kwao, jambo muhimu la Xiaoxue ni "hifadhi." Kabla ya ardhi haijagandishwa kabisa, wanafanya umwagiliaji wa majira ya baridi ili kuhifadhi unyevu wa udongo na kuandaa mazingira mazuri kwa mazao, kama vile ngano, katika muda wote wa msimu baridi. Methali ya kilimo inasema, "Kama theluji itaanguka siku ya Xiaoxue, mwaka ujao mavuno yatakuwa mazuri." Leo, mabanda ya kilimo ya kisasa hurekebisha halijoto na unyevu kulingana na vipindi vya kalenda ya kilimo - hekima ya kilimo cha kale inachanganyika na teknolojia ya kisasa.

Pia kuna msemo unavyosema: "Xiaoxue ni wakati wa kuchovya mboga; na Daxue, ni wakati wa kuchovya nyama." Kutokana na hewa kuwa kavu na baridi wakati wa Xiaoxue, watu wanaanza kuchovya mboga na nyama na kutengeneza soseji - maandalizi ya vyakula vitamu kwa ajili ya Mwaka Mpya ujao.

Cha kushangaza ni kwamba, ingawa Xiaoxue ni kipindi kwenye kalenda ya kilimo ya China, pia watu wa nchi za Korea Kusini na Japan wanahifadhi chakula wakati huu. Ingawa mila zinatofautiana, zote ni kujiandaa kwa ajili ya majira ya baridi, na matarajio hayo ya maisha ni hisia ya pamoja ya kitamaduni inayovuka mipaka.

Sasa, kwa kunywa supu moto ya nyama ya ng'ombe ya Luoyang kuondoa baridi, ndipo ninaelewa maana halisi ya "ardhi kugandishwa wakati wa Xiaoxue". Kama msemo unavyosema, "Kipindi cha Xiaoxue kinapofika, hata upinde wa mvua wa jioni hujificha." Huu ndiyo uzuri wa majira hayo: utulivu, starehe na uliojaa shairi la maisha.