Ubalozi na kampuni za China nchini Kenya zatoa fedha za kuboresha miundombinu ya shule ya MCEDO Beijing

Balozi wa China nchini Kenya Guo Haiyan akizungumza kwenye hafla ya kutoa ufadhili iliyofanyika katika Shule ya MCEDO Beijing jijini Nairobi, Kenya, Novemba 25, 2025. (Xinhua/Li Yahui)

NAIROBI - Ubalozi wa China nchini Kenya na Jumuiya ya Uchumi na Biashara ya Kenya na China (KCETA) jana Jumanne wametoa ufadhili wa shilingi milioni 11 za Kenya (dola za Marekani karibu 84,800) kusaidia ukarabati na uboreshaji wa miundombinu katika Shule ya MCEDO Beijing jijini Nairobi, mji mkuu wa Kenya.

Hafla hiyo pia ilishuhudia ubalozi wa China ukitoa ufadhili wa masomo wa mwaka mmoja kwa wanafunzi 20 kutoka shule hiyo iliyo kwenye makazi yasiyo rasmi ya Mathare.

Balozi wa China nchini Kenya Guo Haiyan amesema ufadhili huo unalenga kuboresha mazingira ya masomo na kusaidia wanafunzi kuendelea kusoma shuleni.

“Maendeleo ya Shule ya MCEDO Beijing siku zote yamekuwa jambo muhimu linalofuatiliwa na ubalozi wa China na kampuni za China nchini Kenya,” Balozi Guo amesema, akiongeza kuwa historia ya shule hiyo ya kujitegemea na kuhimili magumu ni mfano dhahiri wa urafiki kati ya China na Kenya na uhusiano wa kati ya watu wa nchi hizo mbili.

Mkurugenzi wa shule hiyo Benedict Kiage amesema ufadhili huo utatumiwa katika awamu ya pili ya ukarabati, ikiwemo kupaka rangi, kuboresha taa, ukarabati wa paa na sakafu, na kutoa makabati mapya, viti, vizima moto, vifaa vya maabara, na madawati.

Amesema uboreshaji huo utaongeza kwa kiasi kikubwa usalama na hadhi katika mazingira ya kujifunzia.

Kiage ameongeza kuwa ushirikiano na ubalozi wa China na kampuni za China katika kipindi cha miaka 17 iliyopita umeibadilisha shule hiyo na kupanua fursa kwa watoto katika makazi hayo ya Mathare.

Yu Xiaodong, mwenyekiti wa KCETA, amesema jitihada hiyo inalenga kujenga mazingira bora na ya kuunga mkono kwa wanafunzi.

Amesema kuwa kampuni za China zimejitolea kutoa mchango kwa jamii za Wakenya kupitia uwajibikaji wa kijamii wa kampuni wakati huohuo zikiimarisha urafiki wa muda mrefu kati ya China na Kenya.

Mkurugenzi wa Shule ya MCEDO Beijing Benedict Kiage akizungumza kwenye hafla ya kutoa ufadhili iliyofanyika katika Shule ya MCEDO Beijing jijini Nairobi, Kenya, Novemba 25, 2025. (Xinhua/Li Yahui)

Picha hii iliyopigwa Novemba 25, 2025 ikionyesha sehemu ya nje ya Shule ya MCEDO Beijing jijini Nairobi, Kenya, Novemba 25, 2025. (Xinhua/Li Yahui)

Yu Xiaodong, mwenyekiti wa Jumuiya ya Uchumi na Biashara ya Kenya na China, akizungumza kwenye hafla ya kutoa ufadhili iliyofanyika katika Shule ya MCEDO Beijing jijini Nairobi, Kenya, Novemba 25, 2025. (Xinhua/Li Yahui)

Picha hii iliyopigwa Novemba 25, 2025 ikionyesha hafla ya kutoa ufadhili iliyofanyika katika Shule ya MCEDO Beijing jijini Nairobi, Kenya, Novemba 25, 2025. (Xinhua/Li Yahui)