Roboti za exoskeleton zasaidia watu kupata tena uwezo wa kutembea mkoani Zhejiang, Mashariki mwa China

Mtu akijaribu roboti ya exoskeleton ya kusaidia kubeba mizigo viwandani kwenye shughuli ya manunuzi katika Uwanja wa Wushan mjini Hangzhou, Mkoa wa Zhejiang, mashariki mwa China. (People's Daily Online/Kang Mengqi)

Roboti hiyo ya exoskeleton iliundwa na kampuni mpya RoboCT, yenye makao yake mjini Hangzhou.

Kituo cha kurejesha utimamu wa mwili kwa kutumia AI cha kampuni hiyo pia kilivutia watembeleaji wengi, kikionyesha vifaa vya hali ya juu, ikiwa ni pamoja na roboti ya exoskeleton ya kusaidia shughuli viwandani na roboti ya exoskeleton ya mambo ya afya na mazoezi ya kujenga mwili.

Roboti hizo za exoskeleton zilianza kufanyika katika mradi wa baada ya masomo chuoni na mwanzilishi wa kampuni hiyo, Wang Tian.

"Kamba zilichukuliwa kutoka kwenye mkoba wa zamani wa kubebwa mgongoni, na soli za miguu zilikatwa kutoka kwenye kandambili zilizochakaa," Wang amekumbuka muundo wa kwanza wa kifaa hicho.

Aliunganisha sehemu za kifaa hicho kwa mkono kwenye ghorofa ya chini ya ardhi ya jengo la chuo, akitumaini tu kwamba kingemsaidia kurusha mpira ili kufunga pointi za mpira wa kikapu kwa urahisi zaidi. Hakuwahi kufikiria kwamba kifaa hicho cha kawaida siku moja kingesaidia watu kutembea tena.

Wang ambaye alilelewa na kukulia katika familia ya wataalamu wa matibabu, baadaye aligundua kuwa roboti hiyo ya exoskeleton aliyounda kwa ajili ya kujifurahisha ilikuwa na uwezo halisi katika urejeshaji utimamu wa mwili. Lakini kubadilisha kifaa hicho cha DIY kuwa bidhaa ya kiwango cha matibabu haikuwa kazi rahisi.

Wagonjwa walipokijaribu kwa mara ya kwanza, hakikuweza kutoshea vimo tofauti vya watu, sehemu za shinikizo zilisababisha kukosa utulivu, na mota zilisumbuka na watumiaji wenye uzani mzito.

Ili kutatua matatizo hayo, timu ya kampuni hiyo ilirudi kwenye maabara, na kuunda sehemu muhimu za kifaa hicho na kupata hataza zaidi ya 500 na hakimiliki nyingine. Baada ya majaribio hospitalini kwa mara zaidi ya 300, exoskeletons hizo zilizidi kuwa zisizosumbua kutumia, zinazobadilika kulingana na mahitaji na ni rahisi kutumia.

Leo hii, roboti hizo za exoskeleton za kampuni hiyo zinatumika katika hospitali na vituo vya urejeshaji utimamu wa mwili zaidi ya 1,700, hivyo kusaidia wagonjwa kujenga upya nguvu na kujiamini katika kutembea.

Picha zikionyesha michoro ya usanifu wa roboti za exoskeleton ya kampuni mpya ya RoboCT, katika kampuni ya awali huko Hangzhou, Mkoa wa Zhejiang, mashariki mwa China. (People's Daily Online/Kang Mengqi)