Maonyesho ya kilimo cha bustani yaanza nchini Ethiopia ili kuongeza mapato ya mauzo ya nje (3)

Watu wakizungumza kwenye Maonyesho ya 10 ya Kimataifa ya Biashara ya Maua na Kilimo cha Bustani mjini Addis Ababa, Ethiopia, Machi 24, 2026. (Xinhua/Geng Xinning)

ADDIS ABABA - Maonyesho ya 10 ya Kimataifa ya Biashara ya Kilimo cha Maua na Bustani yameanza rasmi jana Jumanne mjini Addis Ababa, mji mkuu wa Ethiopia, kwa wito wa kuongeza mauzo ya nje ya bidhaa za kilimo cha bustani.

Tukio hilo la siku tatu limeleta pamoja waonyeshaji bidhaa zaidi ya 150 wa ndani na kimataifa kutoka nchi na maeneo zaidi ya 50 ili kuhimiza mbinu za kilimo ambazo ni rafiki kwa mazingira ya asili.

Akizungumza kwenye tukio hilo, Sofia Kassa, waziri wa nchi wa sekta ya uwekezaji wa kilimo na pembejeo ya Wizara ya Kilimo ya Ethiopia, amesema Ethiopia sasa ni miongoni mwa wazalishaji wanaoongoza duniani wa maua yaliyokatwa, ikizalisha dola za Marekani zaidi ya nusu bilioni kwa mwaka na ni muuzaji nje wa pili kwa ukubwa barani Afrika katika sekta hiyo.

Akisisitiza kwamba mauzo ya nje ya bidhaa za bustani ya nchi hiyo yanabaki kuwa madogo ikilinganishwa na uwezo wake, waziri huyo wa nchi ametoa wito wa uwekezaji na mapato zaidi kutokana na mauzo ya nje ya matunda na mboga za majani.

Nega Mequanint, mwenyekiti wa Jumuiya ya Wazalishaji na Wauzaji Nje wa Mazao ya Bustani wa Ethiopia, amesema maonyesho hayo yamekutanisha wadau kutoka kote duniani, wakiwemo wazalishaji, wauzaji nje, wawekezaji, wasambazaji wa pembejeo, watunga sera na washirika wa maendeleo, wote wakiwa wameunganishwa na maono ya pamoja ya ubora, uendelevu na ukuaji.

Kwa mujibu wa jumuiya hiyo, sekta hiyo inaajiri Waethiopia takriban 200,000, wengi wao wakiwa wanawake na vijana, wakichangia sehemu kubwa katika ajira za vijijini, uzalishaji wa mapato, kupunguza umaskini na maendeleo ya ujuzi.

Kilimo cha bustani ni chanzo cha pili cha fedha za kigeni kwa ukubwa katika sekta ya kilimo ya Ethiopia baada ya kahawa, kikizalisha dola za Marekani takriban milioni 565 katika mapato ya mauzo ya nje wakati wa mwaka uliopita wa fedha, uliomalizika Julai 8, 2025.

Tukio hilo la siku tatu linatoa majukwaa ya kukutanisha wafanyabiashara, pamoja na majukwaa ya ngazi ya juu yanayohusu mada kama vile mitindo ya watumiaji, usalama wa chakula, ufadhili endelevu na mitindo ya soko katika matunda na mboga za majani, miongoni mwa mengine.