Hichilema achaguliwa tena kuwa rais wa Zambia

LUSAKA - Rais aliyeko madarakani sasa Hakainde Hichilema amechaguliwa tena kuwa rais katika uchaguzi wa urais wa Zambia, Tume ya Uchaguzi ya Zambia (ECZ) imetangaza mapema leo Jumanne.

Mwenyekiti wa ECZ Mwangala Zaloumis ametangaza matokeo rasmi kwenye Kituo cha Kitaifa cha Matokeo ya Uchaguzi katika mji mkuu Lusaka, akimtangaza Hichilema, mgombea wa chama tawala cha United Party for National Development, kuwa mshindi.

Kwa mujibu wa takwimu zilizotolewa na tume hiyo, Hichilema amepata kura halali zaidi ya milioni 2.9, ambayo ni zaidi ya asilimia 50 ya kura zote, akitimiza sharti la kikatiba kwa ushindi wa moja kwa moja bila duru ya pili.

ECZ imesema ingawa matokeo kutoka majimbo machache bado hayajatangazwa, hayatabadilisha matokeo ya mwisho ya uchaguzi huo wa siku moja uliofanyika Alhamisi wiki iliyopita.

Chini ya katiba ya Zambia, mgombea wa urais lazima apate zaidi ya asilimia 50 ya kura zote halali zilizopigwa ili kutangazwa mshindi.

Zoezi la kuhesabu kura lilisitishwa kwa muda Ijumaa wiki iliyopita kutokana na vurugu zilizowalenga wafanyakazi wa vituo vya kupigia kura na ripoti za wizi wa karatasi za kura katika baadhi ya vituo vya kupigia kura. Shughuli za kuhesabu zilianza tena baada ya hali ya usalama kudhibitiwa.

Hichilema alichukua madaraka kwa mara ya kwanza Agosti 2021 baada ya ushindi wa kishindo wa uchaguzi.