Rais wa Tanzania azindua Kituo cha Kuzalisha Umeme kwa Maji cha Julius Nyerere

Picha iliyopigwa Agosti 21, 2026 ikionyesha mwonekano wa Kituo cha Kuzalisha Umeme kwa Maji cha Julius Nyerere katika Mkoa wa Pwani, Tanzania. (Xinhua/Emmanuel Herman)

DAR ES SALAAM - Rais wa Tanzania Samia Suluhu Hassan siku ya Jumamosi alizindua Kituo cha Kuzalisha Umeme kwa Maji cha Julius Nyerere chenye uwezo wa megawati 2,115, mradi kinara unaotarajiwa kuimarisha utoaji wa umeme na kuharakisha maendeleo ya viwanda na uchumi.

Rais Samia alizindua kituo hicho katika Wilaya ya Rufiji, Mkoa wa Pwani, akisema uwezo huo mpya wa kuzalisha umeme unapaswa kutoa manufaa yanayoweza kupimika katika uzalishaji wa bidhaa, biashara, uchimbaji madini, kilimo cha kisasa, huduma za umma, uwekezaji na ajira.

Amesema kituo hicho chenye vitengo tisa sasa kinachukua karibu nusu ya umeme unaoingiza kwenye gridi ya taifa ya Tanzania, hali ambayo itaboresha kwa kiasi kikubwa uhakika na usalama wa usambazaji.

"Mradi huu umeonyesha uwezo wa Tanzania. Lazima sasa tutumie ipasavyo uwezo huu ili kusukuma mbele miradi mingine ya kimkakati na kujenga taifa imara, linalojitegemea," Hassan amesema.

Picha iliyopigwa Agosti 21, 2026 ikionyesha mwonekano wa Kituo cha Kuzalisha Umeme kwa Maji cha Julius Nyerere katika Mkoa wa Pwani, Tanzania. (Xinhua/Emmanuel Herman)

Kituo hicho, kilichojengwa kwa ushiriki wa Shirika la Ujenzi wa Umeme la China (PowerChina) na Shirika la Umeme la Dongfang, kina uwezo wa jumla uliowekwa wa megawati 2,115, Zhang Rui, meneja mradi wa PowerChina, amesema.

Amesema PowerChina ilichukua kazi ya ujenzi wa kazi kuu, ikiwemo bwawa kuu, bonde la kutuliza kasi ya maji, mfumo wa kusafirisha maji, mahandaki ya kuchepusha maji na miundo ya chuma, vilevile usanifu wa jumla wa kihandisi na vifaa vya kuunga mkono.

Tan Jin, meneja mradi wa Shirika la Umeme la Dongfang, ameelezea kuwa walitoa vitengo vyote tisa vya jenereta za turbine za kuzalisha umeme kwa maji, vali kuu za kuingiza maji na seti nyingine kamili za vifaa vya mitambo ya elektroniki, na kufanya kazi ya ufungaji, uanzishaji wa vifaa na uendeshaji wa majaribio.

Watu wenyeji wakipeperusha bendera kusherehekea uzinduzi wa Kituo cha Kuzalisha Umeme kwa Maji cha Julius Nyerere katika Mkoa wa Pwani, Tanzania, Agosti 22, 2026. (Xinhua/Emmanuel Herman)

Mameneja hao wawili wamesema kuwa wakati wa ujenzi, kazi ya ujenzi iliyoshirikisha kampuni za China ilitoa ajira takriban 14,000 kwa wakazi wenyeji. Maelfu ya Watanzania walipata mafunzo ya ujuzi wa kitaalamu kutoka kwa wahandisi Wachina katika maeneo kama vile kuchomelea, kurekebisha chuma, useremala, uendeshaji wa mashine nzito na upimaji, hali ambayo imesaidia kujenga nguvu kazi imara zaidi ya ndani.

Humphrey Moshi, profesa wa uchumi katika Chuo Kikuu cha Dar es Salaam nchini Tanzania amesema kuwa mradi huo unatarajiwa kuboresha usambazaji wa umeme kwa kaya na huduma za umma, kuimarisha nafasi ya Tanzania katika soko la nishati la kikanda la Afrika Mashariki, na kutoa nishati ya kuaminika kwa ajili ya muunganisho wa kikanda na maendeleo ya kijamii na kiuchumi.