Wataalamu wa China wakamilisha kampeni ya kudhibiti konokono dhidi ya kichocho visiwani Zanzibar

Timu ya wataalamu ya mradi wa kudhibiti kichocho Zanzibar unaofadhiliwa na China imekamilisha operesheni ya miezi mitatu ya kudhibiti konokono katika maeneo yote muhimu ya maji yanayohusiana na kichocho visiwani Zanzibar.

Kiongozi wa timu hiyo, Wang Wei, alisema Jumanne kwamba kampeni hiyo ilifikia maeneo yote ya kipaumbele kupitia matumizi ya mashine mpya za kuua konokono zilizotolewa na China ambazo ni rafiki kwa mazingira, pamoja na dawa ya kuua konokono yenye asilimia 25 ya niclosamide ethanolamine.

Wang alibainisha kuwa kukamilika kwa mradi huo kuliashiria matumizi makubwa ya kwanza ya dawa za kuua konokono visiwani Zanzibar kwa kutumia vifaa vilivyotengenezwa ndani ya nchi, na kwamba mafanikio haya yanaonesha utekelezaji wa kivitendo wa mfumo wa China wa teknolojia ya kudhibiti kichocho barani Afrika.

Kwa mujibu wa taarifa kutoka kwenye mradi huo, ili kukabiliana na mitandao ya maji iliyosongamana ya Zanzibar na mazingira tata ya kuzaliana kwa konokono, wataalamu wa China walifanya tafiti za kimfumo ili kujua konokono wanavyosambaa na kuweka mpango wa udhibiti unaochanganya hatua za kikemikali na kiufundi, wakilenga vyanzo vya maji vya majumbani, njia za umwagiliaji, na maeneo mengine hatarishi ya watu kuweza kugusana na maji.