Goli la Torres katika dakika za mwisho laipa Hispania ubingwa wa Kombe la Dunia (3)

Nicolas Tagliafico (kushoto) wa Argentina akishindana na Ferran Torres wa Hispania wakati wa mechi ya fainali kati ya Hispania na Argentina katika Kombe la Dunia la FIFA 2026 kwenye Uwanja wa New York New Jersey, Marekani, Julai 19, 2026. (Xinhua/Li Ming)

NEW YORK - Mchezaji wa akiba Ferran Torres amefunga bao katika muda wa nyongeza wakati Hispania ikiichapa Argentina iliyokuwa na wachezaji 10 bao 1-0 na kushinda fainali ya Kombe la Dunia katika mechi ya fainali ya Kombe la Dunia la FIFA 2026 iliyochezwa usiku wa Jumapili katika Uwanja wa New York New Jersey, Marekani.

Torres, mchezaji aliyechukua nafasi ya Mikel Oyarzabal dakika ya 62, aliiweka Hispania mbele katika dakika ya 106, akimalizia shambulizi la haraka kwa shuti kali lililozama nyavuni.

Argentina ililazimika kucheza muda wote wa nyongeza ikiwa na wachezaji 10 pekee kufuatia kutolewa kwa Enzo Fernandez kwa rafu mbaya dhidi ya Pau Cubarsi.

Matokeo hayo yameipa Hispania taji lake la pili la Kombe la Dunia na la kwanza tangu mwaka 2010. Argentina, ambayo ilikuwa ikilenga kuwa bingwa wa kwanza kutetea ubingwa tangu Brazil mwaka 1962, ilionyesha kiwango kibovu zaidi katika fainali hiyo, baada ya kutopoteza mechi yoyote kabla ya Jumapili

Akicheza katika mashindano yake ya sita ya Kombe la Dunia na pengine ya mwisho, nahodha wa Argentina Lionel Messi alikabwa vikali na kuonesha dakika chache tu za hatari mwishoni mwa mchezo huku Hispania ikimpa nafasi ndogo ya kucheza.

Argentina iliendelea kufanya kazi nzito baada ya kipindi cha mapumziko mafupi. Muda mfupi baada ya kuanza tena, Rodrigo De Paul alipoteza mpira katikati ya uwanja na Alex Baena alisonga mbele na kushuhudia tu shuti lake likipanguliwa na golikipa wa Argentina Emiliano Martinez Martinez.

Beki ya Argentina ilikuwa imezingirwa na inapaswa kumshukuru Martinez kwa kutoruhusu bao mwishoni mwa muda wa kawaida.

Hatimaye, mlango ulifunguka wakati Nico Williams alipokutana na krosi ya Pedro Porro kwenye nguzo ya nyuma, akiupiga kichwa mpira kwenye uelekeo wa Torres ambaye alifunga bao hilo la ushindi na kumwacha Martinez bila nafasi ya kuokoa.

Giuliano Simeone alipata nafasi ya kuisawazishia Argentina lakini alipiga shuti ambalo lilipaa juu ya lango kufuatia kona na kuifanya Hispania kujihakikishia taji hilo.