Uzuri wa Majira: Baridi Kubwa

Habari zenu, mimi ni Sisi, mpenda kutalii! Leo ni Dahan, yaani Baridi Kubwa, kipindi cha mwisho cha vipindi 24 vya kalenda ya jadi ya China. Vaa koti lako nene zaidi la kujikinga na baridi, na jiunge nami kwenda Mji wa Genhe, Mkoa wa Mongolia ya Ndani, Kaskazini mwa China, unaojulikana kwa jina "Ncha ya Baridi ya China."

Chini ya Mnara wa Ncha ya Baridi ya China, watalii hukusanyika kuona halijoto inayoonyeshwa kwenye mnara huo wenye urefu wa mita 24. Kwa mujibu wa rekodi za kihistoria, halijoto ya chini kabisa hapa imewahi kufikia nyuzi joto ya digrii 58 chini ya sifuri. Katika baridi kali kama hii, maji ya moto yakimwagwa hubadilika mara moja kuwa ukungu wa barafu.

Wakati wa Dahan, licha ya ardhi kuganda kwa barafu, mto usioganda wa Genhe bado hutiririka taratibu. Mvuke hupanda juu, kushika matawi ya miti na kuunda barafu ya ukungu, ukichora mandhari ya kipekee ya majira ya baridi. Katika Eneo la Kabila la Waaoluguya la Wafugaji wa Reindeer, reindeer husimama kimya katika msitu uliofunikwa na theluji. Mwanga wa jua unapopenya kati ya miti, watalii hupata utulivu wa moyo na kusisimka.

Dahan pia ina uhusiano wa karibu na kilimo. Methali ya Kichina yanasema, "Kama theluji itaanguka mara tatu wakati wa Baridi Kubwa, wakulima watakuwa na chakula na mavazi ya kutosha." Theluji nyingi katika kipindi cha Dahan husaidia halijoto ya chini kuangamiza wadudu kiasili, na hivyo kuandaa mazingira ya mavuno mengi katika mwaka unaofuata.

Siri ya kukabiliana na baridi iko kwenye jiko la Wachina. Wakati wa Dahan, watu hula vyakula vilivyotengenezwa na wali wa kunata, ambao husaidia kuongeza nishati na joto la mwili haraka. Katika eneo la Kaskazini mwa China, kuna desturi ya kula "keki ya kufukuza baridi," yaani xiaohangao, inayoashiria maendeleo thabiti na utajiri unaoongezeka. Katika eneo la Kusini mwa China, familia huchemsha supu ya kuku; bakuli moja tu linatosha kufukuza baridi yote ya majira ya baridi.

Kwa kweli, watu kote duniani hushiriki hekima inayofanana wanapokabili baridi. Katika peninsula ya Skandinavia, watu wa Denmark hurithisha utamaduni wa "Hygge," ambao unamaanisha utulivu na faraja wakati wa majira marefu ya baridi. Kwa kuandaa vinywaji vya moto na kufurahia chakula kizuri, desturi hii inafanana kwa namna fulani na mila ya Wachina ya kujikinga na baridi kupitia lishe wakati wa Dahan.

Mara tu Dahan inapopita, majira ya mchipuko yanakaribia!